ដោយ៖ឧត្តរ
ឧត្តរមានជ័យ៖ថ្ងៃទី៥ ខែមេសា ឆ្នាំ២០២៥ មន្ទីរៀបចំដែនដី នគរូបនីយកម្ម និងសំណង់ខេត្តឧត្តរមានជ័យ បានរៀបចំពិធីសំណេះសំណាលជាមួយក្រុមការងារចុះបញ្ជីដីធ្លីមានលក្ខណៈជាប្រព័ន្ធ ដើម្បីជំរុញប្រសិទ្ធភាពក្នុងការងារចុះបញ្ជីដីធ្លី និងការអនុវត្តឲ្យប្រសើរឡើងថែមទៀត។
ពិធីសំណេះសំណាលនេះក្រោមអធិបតីភាពរបស់ ឯកឧត្តម សេង ថានី អនុរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និង ឯកឧត្តម មាន ចាន់យ៉ាដា អភិបាលខេត្តឧត្តរមានជ័យ និងមានការចូលរួមពីស្ថាប័ន អាជ្ញាធរ ព្រមទាំងមន្ត្រីជំនាញពាក់ព័ន្ធផ្សេងៗក្នុងខេត្ត។
លោក គឹម គាវិន ប្រធានមន្ទីរៀបចំដែនដី នគរូបនីយកម្ម និងសំណង់ ខេត្តឧត្តរមានជ័យ បានលើកឡើងអំពីបញ្ហាប្រឈមតិចតួចដែលក្រុមការងារចុះបំពេញភារកិច្ចវាស់វែងព្រមទាំងចុះបញ្ជីដីធ្លីតែងតែប្រឈមខ្លះ ជាក់ស្តែងនៅទីតាំង ដូចជា បញ្ហាផ្លូវចូលទៅកន្លែងវាស់វែង, ការយល់ច្រឡំរបស់ប្រជាពលរដ្ឋ, បញ្ហាផ្លូវចរាចរណ៍ជាដើម។
បើទោះបីជាប្រឈមបែបនេះក៏ដោយ ក្រុមការងារបានបន្តបំពេញភារកិច្ចដោយមានវិជ្ជាជីវៈខ្ពស់ ក៏ដូចជាការប្រឹក្សាប្រជាជនដោយមានភាពស្មោះត្រង់ និងដំណោះស្រាយបញ្ហាមានជំហានសំខាន់មួយក្នុងការកសាងកិច្ចសហការជាបន្តបន្ទាប់ ដើម្បីជឿជាក់ថាការចុះបញ្ជីដីធ្លីមានលក្ខណៈជាប្រព័ន្ធនៅក្នុងខេត្តអាចអនុវត្តបានដោយមានប្រសិទ្ធភាព និងជោគជ័យ។
ឯកឧត្តម មាន ចាន់យ៉ាដា បានផ្តល់អនុសាសន៍ និងណែនាំឲ្យមន្ត្រីជាក់ស្តែងបញ្ចប់ការងារចុះបញ្ជីដីធ្លីមានលក្ខណៈជាប្រព័ន្ធឲ្យបានរួចរាល់នៅចុងខែមេសានេះ ដើម្បីធានាបាននូវលទ្ធផលច្បាស់លាស់ និងបង្កើនការជឿជាក់របស់ប្រជាពលរដ្ឋចំពោះការងាររបស់រដ្ឋបាលក្នុងវិស័យដីធ្លីក្នុងខេត្តមួយនេះ៕
